Për Ty - Më shumë se 100 delfinë janë gjetur të ngordhur në Amazonën braziliane, mes një thatësire historike dhe temperaturave të larta rekord të ujit që në disa vende kanë kaluar 39 gradë Celsius.

Delfinët e ngordhur u gjetën të gjithë në liqenin Tefé në javën e fundit, njoftoi Instituti Mamirauá, një strukturë kërkimore e financuar nga Ministria e Shkencës braziliane.

Instituti tha se një numër kaq i lartë i vdekjeve ishte i pazakontë dhe sugjeroi se temperaturat e larta rekord të liqenit dhe një thatësirë historike në Amazonë mund të kenë qenë shkaku.

Lajmi ka të ngjarë të shtojë shqetësimet e shkencëtarëve të klimës mbi efektet që kanë aktiviteti njerëzor dhe thatësirat ekstreme në rajon.

“Është ende herët për të përcaktuar shkakun e kësaj ngjarjeje ekstreme, por sipas ekspertëve tanë, sigurisht që lidhet me periudhën e thatësirës dhe temperaturat e larta në liqenin Tefé, në të cilin disa pika kalojnë 39 gradë Celsius”, tha instituti.

Lumi Amazonë, rruga më e madhe ujore në botë, aktualisht është në sezonin e thatë dhe disa ekzemplarë të faunës së lumenjve po vuajnë gjithashtu nga temperaturat e larta rekord.

Studiuesit dhe aktivistët po përpiqen të shpëtojnë delfinët e mbijetuar duke i transferuar nga lagunat dhe pellgjet në periferi në pjesën kryesore të lumit ku uji është më i freskët, por operacioni nuk është i lehtë për shkak të largësisë së zonës.

“Transferimi i delfinëve në lumenj të tjerë nuk është aq i sigurt, sepse është e rëndësishme të verifikohet nëse toksina ose viruse janë të pranishme”, tha André Coelho, një studiues në Institutin Mamiraua.

Thatësira në Amazonë po ndikon edhe në ekonomi. Nivelet nën mesataren e ujit janë raportuar në 59 komuna në shtetin e Amazonas, duke penguar si transportin ashtu edhe aktivitetet e peshkimit në lumë.

Autoritetet presin thatësira edhe më akute gjatë dy javëve të ardhshme, të cilat mund të rezultojnë në vdekje të mëtejshme të delfinëve.