Për Ty — Komisionari i Bashkimit Evropian (BE) për tregun e brendshëm, Thierry Breton, tha të mërkurën se ai u kishte kërkuar platformave të mediave sociale që të përgatiteshin për rrezikun e “ekzekutimeve me transmetim të drejtpërdrejtë” nga Hamasi.
“Si pjesë e ndërveprimeve tona me platformat, ne u kemi kërkuar në mënyrë specifike atyre që të përgatiten për rrezikun e ekzekutimeve me transmetim të drejtpërdrejtë nga Hamasi — një rrezik i afërt nga i cili duhet të mbrojmë qytetarët tanë — dhe ne po kërkojmë garanci që platformat të jenë të përgatitura mirë për raste të tilla”, tha Breton në një fjalim në Parlamentin Evropian.
Ai tutje u tha CEO-ve të rrjeteve gjigante se “ekziston një ligj dhe ai duhet respektuar”.
“Por le të jemi të qartë në lidhje me këtë qasje. Duke vënë në dukje përgjegjësinë e platformave — dhe CEO-ve të tyre — në menaxhimin (ose mungesën e menaxhimit) të përmbajtjes së paligjshme të shpërndarë në platformat e tyre, ne po dërgojmë një sinjal shumë të qartë: gjërat kanë ndryshuar në Evropë. Ekziston një ligj, ai duhet respektuar”.
Akti i Shërbimeve Digjitale (DSA) është një rregullore në ligjin e BE-së që synon të krijojë një hapësirë digjitale më të sigurt ku mbrohen të drejtat themelore të përdoruesve dhe të krijojë një fushë loje të barabartë për bizneset.
Një zëdhënës i Brigadave Al-Qassam të Hamasit tha javën e kaluar se Hamasi do të fillojë ekzekutimin e pengjeve civile dhe transmetimin e tyre nëse Izraeli synon njerëzit në Gaza pa paralajmërim.
“Ne deklarojmë se do t’i përgjigjemi çdo shënjestrimi të njerëzve tanë që janë të sigurt në shtëpitë e tyre pa paralajmërim, me ekzekutimin e pengjeve tona civile dhe do ta transmetojmë atë me audio dhe video”, tha Abu Obaida në një deklaratë audio të transmetuar në Al Jazeera.
Hamasi ka publikuar një video të Mia Schem, një vajzë 21-vjeçare franko-izraelite e marrë peng gjatë sulmit në Izrael.
Në pamje, Schem, krahu i të cilës i plagosur shfaqet duke u trajtuar nga një punonjës mjekësor i paidentifikuar, kërkon që t’i kthehet familjes sa më shpejt të jetë e mundur.
Në videon prej 78 sekondash, e para e lëshuar nga Hamasi e një pengjeje që dyshohet se fliste nga robëria, Schem tha se ajo po mbahej në Gaza, po trajtohej mirë dhe bëri apel për lirimin e saj.
