Për Ty - Hamasi ka publikuar një video të Mia Schem, një vajzë 21-vjeçare franko-izraelite e marrë peng gjatë sulmit në Izrael.

Në pamje, Schem, krahu i të cilës i plagosur shfaqet duke u trajtuar nga një punonjës mjekësor i paidentifikuar, kërkon që t’i kthehet familjes sa më shpejt të jetë e mundur.

Në videon prej 78 sekondash, e para e lëshuar nga Hamasi e një pengjeje që dyshohet se fliste nga robëria, Schem tha se ajo po mbahej në Gaza, po trajtohej mirë dhe bëri apel për lirimin e saj.

Është e paqartë se kur është filmuar dhe nëse ajo ka qenë nën presion gjatë xhirimeve. Analiza nga New York Times sugjeron se pjesë të saj janë filmuar gjashtë ditë më parë.

Schem u rrëmbye më 7 tetor nga festivali i muzikës Supernova, ku u vranë qindra.

Një përfaqësuese e familjes, e cila ishte në mesin e një grupi qytetarësh francezë që iu drejtuan javën e kaluar Macronit për të ndihmuar në lirimin e të afërmve të tyre të zhdukur, konfirmoi identitetin e saj.

Familja e Schem u tha mediave izraelite gëzimin e tyre kur panë videon e saj, me tezen e Schem, të quajtur Galit, duke e quajtur atë “një hap shumë domethënës”. “Ajo duket e lënduar dhe e frikësuar – por të paktën ajo është gjallë”, citohet të ketë thënë ajo.

Të martën, presidenti francez, Emmanuel Macron, e përshkroi videon si “një akt të urryer”. Macron, i cili ndodhet në një vizitë zyrtare në Shqipëri, kërkoi lirimin e saj pa kushte.

“Është një turp të marrësh peng njerëz të pafajshëm dhe t’i ekspozosh në këtë mënyrë të urryer”, tha Macron. Ai shtoi se Franca po punonte me partnerët e saj për të liruar pengjet franceze të mbajtura nga Hamasi.

Të paktën 199 izraelitë dhe të huaj u kapën nga njerëz të armatosur të Hamasit dhe u zunë rob në sulmin, i cili vrau 1,300 njerëz, numri më i madh i të vdekurve në një ditë të vetme në historinë 75-vjeçare të Izraelit.

Të dielën, ministrja e jashtme franceze, Catherine Colonna, takoi familjen e Schem dhe ata të të tjerëve që u vranë ose besohet se janë marrë peng.

Ushtria izraelite lëshoi një deklaratë, duke thënë se ishte në kontakt të vazhdueshëm me familjen e Schem dhe duke dënuar Hamasin si një “organizatë terroriste vrasëse”. Ushtria tha se po përdorte “të gjitha masat inteligjente dhe operacionale” për kthimin e robërve.

“Në video, Hamasi po përpiqet të portretizojë veten si një organizatë humane, ndërkohë që është përgjegjëse për vrasjen dhe rrëmbimin e foshnjave, grave, fëmijëve dhe të moshuarve”, tha ushtria.

Më herët, Khaled Meshaal, një ish-shefi i Hamasit, i cili drejton zyrën e diasporës në Doha, foli për televizionin AlAraby dhe tha se nuk do të kursente asnjë përpjekje për të përdorur robërit e saj si mjet për të liruar 6,000 palestinezë të mbajtur në burgjet izraelite.

Persona të armatosur nga Hamasi morën dhjetëra pengje pasi pushtuan komunitetet jugore izraelite dhe bazat ushtarake më 7 tetor, duke vrarë më shumë se 1,300 njerëz.

Hamas releases video of hostage for first time pic.twitter.com/22w5R99lbn

— Sprinter (@Sprinter99800) October 17, 2023